الحلقة الثالثة
( اخويا ..)
نقرتين لعرض الصورة في صفحة مستقلة
( اخويا ..)
+السلام عليكم ورحمه الله وبركاته
= وعليكم السلام ورحمه الله وبركاته
عامل ايه ؟
+ الحمد لله تمام
وانت ايه اخبارك ؟

= الحمد لله بخير

+الحمد لله على كل شئ
طبعا احنا شايفين الاحتقان الغريب
الموجود حاليا بيننا
فى حاجات كتيره
الكوره انت بتشجع المنتخب الفلانى
وانا بشجع منتخب تانى
انت بتشجع نادى وانا بشجع نادى
او فى السياسه
انت تبع الحزب الفلانى وشايف انك انت
بس اللى صح وكله غلط
وكمان مفيش عندك اى شئ غلط
وانا غيرك واكرهك جدا لانك بتتريق ديما
على الحزب اللى انتمى ليه
او حتى فى الدين
انت بتحب الداعيه الفلانى
واكره غيره
ولو حد سمع له يبقى هو كمان غلط ويحصل
بينا كره داخلى
او يكون انت معاك حاجه معينه
ومش معايا احقد عليك واحسدك

= فعلا والله شئ غبى اوى
كلنا بنكرهه لانه بيكرهنا
فى بعض على شئ تافهه
او حتى مش تافه
بس ما يستاهلش اننا نخسر بعض

+ مظبوط
وزى ما احنا متعودين
الاسلام ما سبش مشكله الا ووضع لها
حل
علشان كده لو دورنا
فى القران الكريم
هنلاقى ربنا بيكشف لنا حركه
الشيطان بيحب يعملها
يعنى باللغه الدارجه بيننا
حرق ورقه فى لعبه بيعملها
وهى انه بيحب يوقع بين الناس
والدليل لما ربنا حبيبنا قال

(انما يريد الشيطان ان يوقع بينكم
العداوه والبغضاء فى الخمر والميسر )

ودى قاعده مهمه جدا
وهى ان الشيطان عاوز
يولع ويوقع بيننا طبعا
علشان لما انا اكرهك وانت تكرهنى
انا هكره فيك كل الناس واقع اقول عيوبك وبس
وانت كذلك
وبكده واحده واحده هتلاقى الناس كلها مش طايقه بعضها

= انا معاك بس ربنا حدد
انه بيحب يوقع بيننا فى الخمر والميسر بس

+ كلام جميل وبيدل انك مركز
لكن لو ركزت اكتر هتلاقى
ان الشيطان هدفه انه يخلينا نعصى
صح ؟

= مظبوط ...

+ طيب لما واحد بيشرب خمر
اكيد بيعمل مصيبه كبيره وبيعصى
= فعلا
+ طيب هو هيستفاد ايه
ما هو كده كده بيعصى ربنا
الشيطان هيستفاد ايه
انه يخلى اللى بيعصى يعمل كمان معصيه
انه يوقع بينه وبين صحابه

= اه صح هيستفاد ايه ؟

+ بص هقولك
فاكر لما قولنا ان الاسلام
ينفع لأى زمان ومكان

= اه لما قولنا انه بيحط الاساس
والقواعد العامه
وانا ابنى براحتى عاوز ابنى بيت
او عماره او فيلا او قصر
طبعا ابنى براحتى لان الاساسات
كويسه
وتستحمل اى حاجه
+ مظبوط الله ينور عليك
بص بقى احنا اتفقنا
ان الخمر دى معصيه
صح ؟

= طبعا

+ طيب يبقى معنى ان ربنا يحدد لك
فى الخمر والميسر
يبقى لما نخرج منها القاعده العامه
يبقى الشيطان بيستنى اول ما نبعد عن ربنا
بمعنى اخر
نعصى
ويلعب لعبته انه يوقع بين الناس

= طيب ليه مش بيوقع بيننا
واحنا قريبين من ربنا
مش بنعصى يعنى ؟

+ لانك ساعتها فى حمايه ربنا
واستحاله يقدر يقرب منك

= فعلا والله

+ وكمان اكبر دليل على اللى قلناه
كلام احد العلماء
ان التعريف العام للميسر
هو اى شئ يلهى عن ذكر الله
وطبعا ذكر الله زى الصلاه و
العبادات كلها
يعنى طاعه الوالدين عباده
لو انت قاعد على الكمبيوتر
مهما كنت بتعمل
ووالدتك بتنادى عليك وانت طنشت ولو
للحظه
يبقى الكمبيوتر فى اللحظه دى اتحول لميسر
وانت كده عصيت ربنا
وبكده الشيطان يبتدى يلعب لعبته
وهو انه يدخل يوقع بينا وبين والدتك مثلا
تحصل مشكله من لا شئ

= ايوه فهمت
وفعلا ده بيحصل

+ طيب الحمد لله
وكمان هنبقى نحدد حلقه كامله عن ذكر ربنا
بكل انواعه

= ما احنا عارفينه
اللى هو الصلاه والصوم والاذكار بس

+ بس مين يا مستر
ده مفهوم ذكر ربنا كبييييييييييير اوى
ويارب حلقه واحده تكفى

= يارب

+ نكمل موضوعنا
وكمان هتلاقى ان ربنا قال
( ولا تتبعوا خطوات الشيطان )
يعنى الشيطان لما يجى يلعب لعبته
فى انه يخليك تعصيه وهى مرحله من مراحل
انه يوقع بين الناس
هياخدك واحده واحده
علشان كده ديما ما تستهونس بالذنب وتقول غيرى بيعمل اكتر من كده
لانك فى الاول وفى الاخر اسمك بتعصى
وفى الاول وفى الاخر ربنا حبيبك بيزعل منك
فلازم تروح له بسرعه وتعتذر له
علشان يسامحك
ولو كملنا الايه
هنلاقى
ربنا بيقول فيها
ان الشيطان مش عاوز يوقع بينكم وبس
لاء ده عاوز يعمل حاجات كتيير
واحلى حاجه فى الايه دى
ان ربنا حرق له كل اوراق لعبه
يعنى كل الاوراق اللى بيلعب بيها علينا
ونص الايه بيقول
( انما يريد الشيطان ان يوقع بينكم العداوه والبغضاء فى الخمر والميسر و
يصدكم عن ذكر الله و عن الصلاه )
واحنا اتكلما فى حته انه عاوز يوقع
بص بقى الحته دى
يصدكم عن ذكر الله
وعن الصلاه
طبعا الصلاه من الذكر ولكن معنى ان ربنا يخصصها بالذكر لوحدها
يعنى الناس بتاعه اللغه العربيه هيقولو ان
هنا ذكر الخاص بع العام وده علشان ربنا
عاوز يحسسنا بأهميتها
وده هنقف عليه فى وقتها لما نعمل حلقه خاصه بيها
ويكن بص كده على اللفظ اللى ربنا ذكره
(يصدكم )
كان ممكن ربنا يقول ينهاكم
او يبعدكم
ولكن لفظ يصدكم هنا فى حكمه غريبه جدا
هقولك مثال كروى
عارف حارس المرمى لما يصد الكوره
= اه

+ ايه اللى بيحصل بقى ساعتها ؟

= ان لاعب بيشوط الكوره
والحارس بيصدها وبيمنعها انها تدخل جون

+ جميل جدا
ولله المثل الاعلى
ربنا امرنا بحاجات اننا نعملها
مثلا اننا نعيش حياتنا صح وانى مثلا
اهتم بشعرى واسرحه
بس طبعا تكون بنيه انها امر نبوى
الشيطان بقى ما يمنعكش
ويقولك لاء فعلا لازم تسرحه
وبكل خبث يرمى لك حته صغيره خالص
ويخليك تحول نيتك انها علشان يبقى شكلى حلو
ولحد هنا زى الفل
ولكن لعبته علشان اعجب البنات
هنا بقى لعبته
بدون اى شئ خالص
وانت روقت شعرك وكله تمام
بس النيه مش تمام
هنا بقى شغله يصدك عن ذكر الله

= ايه ده
هو انا لما اسرح شعرى واروقه
ده ذكر لربنا

+ ايون بس طبعا بالنيه
انت نيتك
ان الله جميل يحب الجمال
وكمان النبى دعانا لكده
لما قال فيما معناه
من كان لديه شعر فليكرمه
فتكون دى النيه

= يا نجم نفترض ان دى النيه
يبقى ذكر لله

+ايون مش لسه بقولك مفهوم ذكر الله
كبييير جدا
ويارب الحلقه تكفى كمان

= بجد الحلقه دى هتبقى امتى
بجد علشان خاطرى ؟

+ قريب ان شاء الله
نكمل بقى

= ماشى نكمل

+ماشى
وعلشان كده الشيطان مش هيقولك
بلاش تشوط
وان كان ممكن يعملها
ولكن لعبته انه يخليك وانت بتشوط
واحد من الجماهير يرمى طوبه
تتشغل بيها تشوط بره الجون
اللى لو تخيلنا اننا نرضى ربنا
يعنى الجول لو دخل يبقى ربنا يرضى عننا
اللى هو هدفنا
ولله المثل الاعلى
جميل اوى
ولكن خلى بالك
من نهايه الايه
جمله تثبت
ربنا يبقول
( فهل انتم منتهون ؟)
عارف ليه ربنا سألنا السؤال ده

= ليه ؟

+ علشان ربنا فى خلال الايه دى
كشف لك كل اوراق ابليس
فربنا بيقولك
انا كشفت لك اوراقه
اللى ممكن يعملها
الور عليك انت بقى
هل هتسمع كلامى وهتنتهى عن اللى
عاوزه يعمله فيك وانت هتساعده
ولا
هتطنش وهتعمل نفسك مش واخد بالك
+ لازم كل واحد يجاوب بقى
= فعلا
يارب انا هنتهى وهطبق عملى
وطبعا فى الايه اللى بعدها
ربنا بيقدم الحل للناس اللى حطوا
النيه انهم هينتهوا
وربنا بيقول لهم

( واطيعوا الله واطيعوا الرسول
واحذروا فان توليتم
فاعلموا انما على رسولنا البلاغ المبين )

وطبعا بما اننا بنتكلم على الاخوه
اللى المفروض تكون بيننا
وطبعا الدين اتكلم عن الموضوع ده
فى مواضع كتيير وبطرق كتيير
ولكن المره دى هنكتفى باللى قولناه
ولازم قبل ما نمشى
نتعلم قيمه الاخوه
ونبقى اخوات بجد
مش علشان مصالح
نبقى اخوات لله
نحب بعض وننصح بعض
ونخاف على بعض
وهنبقى نتكلم عن الحب فى الله
علشان الصوره تكتمل

= ماشى ربنا يسهل لينا
وليك

+ ماشى يلا بقى
سبحانك اللهم وبحمدك
نشهد ان لا اله الا الله
نستغفره ونتوب اليه

= سبحانك اللهم وبحمدك
نشهد ان لا اله الا الله
نستغفره ونتوب اليه

+السلام عليكم ورحمه الله وبركاته

= وعليكم السلام ورحمه الله وبركاته
فى حفظ الله